Bywgraffiad

Mae Fflur Dafydd yn nofelydd a cherddor o Gaerfyrddin. Cafodd ei nofel gyntaf 'Lliwiau Liw Nos' ei chyhoeddi yn 2005 ac enillodd ei hail nofel, 'Atyniad' Fedal Ryddiaith yr Eisteddfod Genedlaethol 2006 a’i thrydedd nofel, 'Y Llyfrgell', wobr goffa Daniel Owen yn yr Eisteddfod Genedlaethol 2009. Hi yw’r unig ferch i gipio’r ddwy brif wobr honno, ac mae ei nofel 'Y Llyfrgell' hefyd wedi cipio dwy wobr arall, sef gwobr Max Boyce 2010 a gwobr Gwerthwr Ffuglen Gorau 2010-11. Enillodd ei nofel Saesneg gyntaf, 'Twenty Thousand Saints', wobr Awdur Mwyaf Addawol Gwyl y Gelli 2009 a cafodd ei dewis gan y Cyngor Prydeinig fel yr awdur cyntaf o Gymru i fynychu Rhaglen Ysgrifennu Creadigol Prifysgol Iowa 2010. Mae ganddi hefyd MA o Brifysgol Dwyrain Anglia a PhD o Brifysgol Bangor, ac mae’n darlithio ym Mhrifysgol Abertawe.

Mae hi hefyd yn adnabyddus yng Nghymru fel cantores a chyfansoddwraig, a cipiodd deitl ‘Artist Benywaidd y Flwyddyn’ yng Ngwobrau Roc a Phop Radio Cymru 2010. Mae hi wedi cyhoeddi 4 albwm.